واش لغرام يعذب يا ناس؟! ( زجل مغربي)جريدة صوت البحر نيوز
-بقلم: محمد دومو
-مراكش/ المغرب
واش لغرام يعذب يا ناس؟!
ولا غير وحدي لي منو كنعاني!
واش الشوق يخدر لعقل؟!
ولا غير أنا لي بغرامي مفتون!
شحال من عنتر فالدنيا موجود؟!
مجنون بليلى وبحبها مسحور
لغرام هذا، زاد فعذاب حالي
دخلتو من غير شوار البارح ملهوف
واش حتى لهوى يا ناس خبروني!
عندو احكامو وأسرارو؟!
ما جاني جواب ال سؤالي!
ولا لقيت ال قلبي دوى يكون شافي!
أصبحت مجروح، معذب ونقاسي
عايش غريب بين صحابي وحبابي
نتلاوح بالموجة ف بحر لغرام
ما نعرف نعوم ولا أنا قبطان
المد يلوحني من جهة ل الشط
والجزر يرغمني معنف ال قاع لبحر
تعليقات
إرسال تعليق